|
قوناق لارا قوجاق، قونان لارا اوجاق؛
پژاک چاققالینا یوخ و داشناک کافتارینا اوخ!
سلجوق توفارقانلی- 30/3/85
آذربایجان؛ سئوگیلر یوردو:
بلکه آذربایجان یوردونو دونیانین ان قوناق سئور یوردو کیمی تانیتدیرماق اولابیلر. بیزیم اولکه ده خالقین قوناق اوچون هم بوللو سایغی سی واردیر و هم اوره ک دولو سئوگیسی . بو اینسان سئور خیصلتلرین ان گورکملی میثالی، آذربایجان ائولرینده، قوناق اوتاغی نین و قوناق یاتاغی نین اولماسی دیر. بئله لیکله اودلار یوردو، تاریخ بویو بشرییته، قومیت و دینیت اهلییتینه باخمایاراق، اوز سیجاق قوجاغین آچیب بوتون قوناقلاری و هابئله بوتون موحتاج اینسانلاری باغرینا باسیبدیر. آذربایجان تکجه «اودلاریوردو» ده ییل، نییه کی اوره یی هامی اینسانلارا چیرپیندیغی اوچون، بو اولکه یه «سئوگیلر یوردو» دا دئمک اولا بیلر.آنجاق تاسسوفله بعضی کیمسه لر و دسته لر، بیزیم زنگین و انگین یوردوموزا چاغیریلمامیش قوناق کیمین گلیب، ایگرنج قوزغونلار کیمین آنا وطنیمیزه قونماق ایسته ییرلر. بو زامان بیزیم یوردوموز شوبهه سیز «قوردلار یوردو»دور!
- تاریخ تکرار اولا بیلر
جیلولوق زامانیندا، جیلولار میللتیمیزه سیغینیب و سونرا ائرمنی لر و آسوریلرایله بیرلیکده یوزمینلرآذربایجانلی نی، یاراتدیغلاری دهشتلی سوی قیریمدا قوربان ائدیبدیرلر. چوخ آز زاماندان سونرا کوردلر، موسلمان اولدوغلارینا باخمایاراق، قوناقلیق و قونشولوق حاقلارین آیاق آلتیندا قویوب، تورک اینسانلاری، داها آرتیق وحشیتله اولدوردولر. بئله لیکله 20 نجی یوز ایللیین ایکینجی اون ایللیکینده، آذربایجاندا یوزمینلر موسلمان و تورک وطنداشییمیز، نانکور قوناقلار و قانیق قونشولار طرفیندن اولدورولدولر و یوردوموزون باتی بولگه لرینده اولان ثروتلریمیزی، اللری چاتدیقجا تالان ائتدیلر.بو قانلارین توکولمه سی و جانلارین اولدورولمه سی هر زامان تکرار اولابیلر. چونکو تاریخین ان قاباریق قاعیده لریندن بیرسی، تکرار اولماغدیر!
- ایشغالی آذربایجان
شوبهه سیز 85 ایله یاخین دیر کی گونئی آذربایجان، قاپاغان آریاچی کوپکلرین ایشغالیندادیر. قاجار خاقانلیغی نین داغلیماسیندان بوگونه دک ایشغالی آذربایجان، بیر سومورگه (مستعمره)کیمین فارس الینده تالانیر. هامیمیز چوخ آیدین بیلیریک کی ایچری و دیشاری گرگینلیکلره گوره بو آجی ایستیعمار، سونا ارمکده دیر و فارس ایشغالچی لاری ان یاخین زاماندا قار آداملاری کیمین اریییب، سو اولوب، تام قورویاجاغدیرلار!
آنجاق هله لیک چوخ دیققتلی اولمالییق. نظره گلیر بو قاپاغان کوپکلر، یوردوموزو قورتدالاماغا باشلاییب پژاک و داشناک فیتنه لرینی قورتلاماغدادیرلار.
- 300 مین کیلومئتیرلیک قوتسال اراضی
گونئی آذربایجان توپراقلاری، تاریخی اولاراق 300 مین کیلومئتیرلیک اراضینی بورویور.آذربایجان اراضیسینده تورک، گیلک، تات، تالیش، کورد، ائرمنی و آسوری یاشاییر. بو توپراقلاردا تورک موطلق اکثریت اولاراق، نوفوسون یوزده سکسانین تشکیل ائدیر.یقین کی آذربایجان اراضی سینده بوتون یاشایانلار،آذربایجانلی دیرلار.اونلارین بوتون مدنی، دینی، مذهبی و ایجتیماعی حاقلاری محفوظ دور و بیر وطنداش کیمی هر باخیمدان برابر گورونورلر. آنجاق آذربایجان آدی، آذربایجان یوردو، آذربایجان بایراغی و آذربایجان میللتی تورک اساسلی بیرآد، یورد، بایراق و میللتدیر و بوگون تورک میللتلری و گلجکده دوولتری اساسیندا تانیناجاغدیر. آذربایجان خریطه سی تاریخسل و تورکسل بیر خریطه دیر. بو خریطه ده هئچ بیر میللتین یوردونا موطلق گوز تیکلمه ییبدیر.
بیزیم خریطه میز قوتسالدیر و بیر آددیم یوخ، بلکه بیر قاریجدا واز کئچیریلمزدیر. یقین کی بو قوتسال یوردون بیر قاریجیندان اوترو، قان وئرمه یه حاضیریز و قان توکمه یه قادیریز.
قیزیشغان پژاک چاققاللاری:
پ.ک.ک.، پژاک، کوموله، دئمکورات، خیبات و هر هانسی سیاسیال کورد تشکیلاتی نین آذربایجان توپراقلاریندا حوضورو، قیزیشغان چاققاللارین، شهر ایچره سوخولماسینا بنزه ییر. نئچه ایلدیر کی هرهفته، چاققاللارین آذربایجان آلنین دا، قویروق بوللاماقلاری، اینسانلار قاپماقلاری و سونرا دیشاری یا قاچماقلاری خبرلرده گلیر. بلکه هر آی نئچه مظلوم تورک و هابئله موخالیف کورد بو فاشیستلرین حمله لریندن شهید اولورلار. چاققاللارین جینایت ساحه لری گونئی دوغو تورکیه، قوزئی عیراق و باتی آذربایجان توپراقلارینا دک گئنیشله نه بیلیر. اونلارهر بیر تورکو ویا قارشی کوردو، بیر دوشمان کیمی سانیرلار. بو فاشیستلر دئییرلر: تورکو اوشاق اولارکن اولدور، بویویورسه سنی اولدوره جکدیر!
بئله لیکله آذربایجان، کرکوک و تورکیه توپراقلاریندا بو گونه دک مینلر تورک اوشاقلارینین باشی کسیلب و یا آنالاری ایله بیرلیکده شهادته اوغراییبدیرلار.
- قاجار دو نه مینده کوردیستان ویلایتی آذربایجان مملکتی ایچینده دیر
فاشیست کوردلرین کئچن یوزایلدن بری باتی آذربایجاندا، تورکیه ده و کرکوکدا یاراتدیغی یارالار هله ده آجی ییر و شوبهه سیز هئچ بیر زامان ساغالمایاجاغدیر. تاسسوفله تئهرانین پان ایرانیست رژیملری، کئچن 85 ایلده، کورد فاشیستلریندن ساوونمادا و هابئله کوچری کورد نوفوسونون باتی آذربایجاندا یئرله شمه سینده، دایاندیریلماز سیاستلر سوردوروبدورلر. تورکلرین مرکزی ایرانا کوچدورمه سیاستی و غیری بومی کوردلرین آذربایجانا یئرله شدیرمک توطیئه سی ایللر بویو ایجرا اولماقدادیر. ریضاخان چاغینا دک، کوردون جمعیتلی بیر شهره صاحیب چیخماسی اوچون هئچ بیر فاکت یوخدور. نییه کی قاجار زامانیندا کوردیستان یالنیز بیر ویلایت کیمی آذربایجان مملکتی طرفیندن ایداره اولونوردو. او زامانلار کوردیستان آدی اولمادان، اردلان کیمی آدلار ایشله نیردی. بو گونکو کورد شهرلری، یا قورولمامیشدی و یا نهایت بیر سیرا کیچیک و یا بویوک قصبه لر کیمی گوزه گلیردی. نییه کی کورد عومومیتله کوچری ایدی و هئچ بیر شهرده اوتورماغا ریضایت وئرمیردی!
- ریضاخان زامانیندان بری تورکون کوچمه سی و کوردون آخینی باشلاییب
سیمیتقو زامانیندا یوزمینلر تورکون قتلی عامی، سونرا قولدور ریضا چاغیندا، کوردلرین باتی آذربایجاندا سورعتله تخته قاپی اولوب یئرله شمه لری، هابئله محمد ریضا شاه رژیمی و سونرالار ایسلامی جومهوریت چاغیندا، یوزمینلر کورد عیراق اولکه سینده ن و هابئله ایرانین کورد یاشایان بولگه لریندن کوچوب و یا دوغروسو قوپاریلیب و آذربایجان شهرلرینده بوراخیلبیدیرلار.
بئله کی کئچمیشده حتی 100 نفردن 1000نفره دک کوردون اورمودا(اورمیه)، تیکان تپه ده(تکاب) سولدوزدا(نقده)، سویوق بولاقدا(مهاباد) وخانادا(پیرانشهر) اولمادیغلارینا باخمایاراق بوگونلر بو شهرلرده کوردون نئچه مین نفردن نئچه اون مین نفره دک نوفوسو یئرله شیبدیرلر. بئله یئرله شمه لر دونیا قاعیده لری اساسیندا، هئچ بیر یئرلیلیک حاقی تانینمیر. بلکه ده ترسینه اولاراق بئله سیاستلری یورودن حاکیمیتلر، بشریت قارشیسیندا جینایته محکوم اولورلار. آنجاق دونن کی قوناق کوردلر، بوگونکو آذربایجان اراضی سینده بیر آذربایجانلی کیمی یاشاییب وطنداشلیق حاققین قازانا بیله جکدیرلر. یئله لیکله اونلار کورد اولاراق بیر آذربایجانلی سانیلیرلار.
سون آراشدیرمالارا گوره باتی آذربایجانین 3 میلیون نفرلیک اراضی سینده یالنیز300 مین نفره یاخین کورد یاشاییرلار. بو کوردلرین یوزده 99 فائیزی اوزونو آذربایجانلی بیلیرلر و بیر آذربایجان وطنداشی کیمی تورکلر آراسیندا ان راحات جاسینا چالیشیرلار. آنجاق تاسسوفلر اولسون فاشیست کوردلرین بولگه ده یئرله شمه لری نتیجه سینده بعضی ایددیعا لار چاققلاللار طرفیندن طرح اولونور. البته بئله ایددیعالار یالنیز تورک میللتینه شامیل ده ییل. اونلار او قدر خولیائی شکیلده یاشاییرلار کی عربیستانا دک اوز اراضی لرینه داخیل ائدیرلر و بصره کورفزینه چاتماق ایسته ییرلر.لوطفا بو خریطه یه دیققت بویرونوز:
آنجاق حال حاضیرده، تاریخسل اولاراق،1.5 یاریم نفره یاخین تورک و گروس وطنداشلاریمیز، کوردیستان و کیرمانشاه آدلانان بولگه لرده و خوصوصیله سونقور، قوروه،سیریش آباد٬دلبران٬توپ آغاج٬ پیرتاج٬یاستی کند و بیجار ماحاللاریندا کورد باسقی سی آلتیندا یاشاییرلار. آدی چکدیگیمیز تورک شهرلرینین هامیسی آذربایجان اراضی سینه داخیلدیر.
قودورغان داشناک کافتارلاری:
ائرمنی داشناکلاری نین، قارا کیلسه ده ایللیک توپلانتی لارینا، چوخ آز قالیر.هر ایل مورداد آیی نین بیرینجی یاریسیندا، یوزلر داشناک، ایران دوولتی نین ایجازه سی ایله، موختلیف اولکه لردن آذربایجانین آلینی سانیلان داش ماکی نین گونئیینه، چالدیران آرانینا و قارا بولاق ماحالینا گلیب، قارا ضیاءالدین کندینه یاخین، زیارت آدینی داشییاراق، ان سیاسال توپلانتی لاری نین بیری سینی قورورلار.
ائرمنی لرین دئدیگینه گوره قارا کیلسه، قوتسال طاطاووس- ون(موقدس تاده ئیس- ین)، 45-جی میلادی ایلینده، ائرمنی شاهی طرفیندن اولدورولن یئر دیر. اونلار دئییرلر طاطاووس مسیح حضرتلرینین بیر حواری سی کیمی بو بولگه یه گلیب عیسویلیک تبلیغاتی آپاراراق، پاقانیست(کافیروموشریک) گوجلر طرفیندن اولدورولوب سونرا ائرمنی خالقی 301 نجی ایلدن بری عیسویلیکی رسمی بیر دین کیمی سئچندن سونرا، طاطاووس آدینا قارا کیلسه نی تیکیب، اونو قوتسال بیر عابیده کیمی زیارت ائدیبلر. بو کیلسه دپرمده داغیلیب وسونرالار صفوی و قاجار تورک سولطانلاری طرفیندن یئنیدن تعمیر اولونوبدور. تورک قایناغلاری،طاطاووس کیلسه سینی ائرمنی لره یوخ، بلکه عیسوی تورکلرینه آئید بیلیر!
البته ائرمنی قایناغلاری نین دئدیگینه اساسلاناراق، قارا کیلسه نین ایللیک و ائللیک توره نلری 1334 –جو گونش ایلیندن بری باشلانیب و بو گونه کیمی هر ایل ائرمنی زائیرلری نین، زیارت مکانی اولوبدور.بو سوزلرین دوز و یالان اولماسی ایله هئچ ایشیمیز یوخدور. دوغال اولاراق هر بیر خالق اوزو اوچون بیر سیرا دینسل و توپلومسال دبلره و عنعنه لره صاحیبدیر. بئله لیکله آذربایجان اراضی سینده، ائرمنیلرین دینسل توپلانتی سینا، اوزه ل بیر مانع یوخدور.
- قارا کیلسه ییغینجاغی یالنیز دینسل ده ییل، داشناکلار هر یئری بورویوبدورلر!
دونیا بیلیر کی قارا کیلسه ییغینجاغی دینسل بیر ییغینجاق ده ییل و داها آرتیق سیاسال بیر توپلانتی یا بنزه ییر!
بو نو بیلمه لییک کی بو گونکو ایراندا ائرمنی لره آئید اولان عومومی بینالارین چوخونو داشناکلار دولاندیریرلار.تئهرانین، ایصفاهانین، تبریزین،اراکین،اهوازین، اورمونون و سالماسین کیلسه لری و هابئله ایدمان و کولتور مرکزلری عومومیتله داشناک قوروپلاری نین الینده دیر.بئله یئرلرین ان تانینمیشلاری تهراندا «سنت سرکیس» کیلسه سی، «آرارات» و «سیپان» ایدمان مرکزلری، «آلیک» آدلی درگی و «نائیری» آدلی یایین ائوی دیر.
تبریزده بارناوا و ایصفاهاندا جیلفا محلله لرینده یئرلشن بوتون کیلسه لر و ایدمان بینالاری داشناکلارین الینده دیر. بئله لیکله موحافیظه کارسولچو ائرمنی قوروپلاری، آشیری داشناک عوضولری طرفیندن قیراغا قویولموش و اونلارین چالیشمالاری چوخ ضعیفله میشدیر.
- ایران حوکومتی آنتی تورک و آرمئنوفیل بیر حاکیمیتدیر
تاسسوفله ایران دوولتی سوزده بیر موسلمان حاکیمیت اولدغونا باخمایاراق، داشناکلارین ایفراطی و قورخونج ایشلرینه گوز یوموب و حتی بیر چوخ زاماندا آنتی تورک موجادیله لرینی آلقیشلاییبدیر.
مثلا هر ایل ایران دوولتی نین ایللیک بودجه سینده 1.5 میلیارد تومندن آرتیق ائرمنی لره مادی یاردیم آییریلیر. اونلارین بوراخیلمیش کیلسه لری «سازمان میراث فرهنگی» طرفیندن تعمیر اولونور، ایدمان مرکزلرینه آیدان آیا یوزمینلر تومن پول وئریلیرو درگی و کیتاب نشریاتینا چوخلو مادی یاردیم اولونور.هابئله ائرمنی لره بویوک پروپاقاندا ایمکاناتی وئریلیبدیر. ائرمنی لر و دوغروسو داشناکلار هر ایل آوریلین 24 جو گونونده ، اوز سیاسال نوماییشلرین تورکلره قارشی ایران دوولتی کومکلیگی ایله ایره لی سورورلر. اونلارا فارس درگی لرینده و ایران صدا وسیما سیندا تریبونلار وئریلیر و بئله لیکله آرمئنو فیل تبلیغاتی آپاریلیر.
مثلا بیلدیکلریمیزه گوره ایهانتچی (باغلانمیش)ایران درگی سینده ائرمنی ، لوببی سی(لابی سی) اوزو اوچون اوزه ل بیر یئر آچمیشدی و شوبهه سیز بو درگی نین دولاندیرما سیاستلرینده جیدی اویون اویناییردی. آنتی تورک و ائرمنی لوببی لرینی همشهری، شرق و ایططیلاعات درگی لرینده ده گوره بیلریک.4 گون اونجه صدا و سیمانین دوردونجو کانالیندا، «مستند چهار» آدلی بیر گئجه وئرلیشینده، موتفیقلر زامانی تبریزین ائرمنی اوسقوفونون جینازه توره نیندن بیر پیلانلانمیش فیلمین گوستریلمه سی و بئله لیکله گونئی آذربایجان باشکندینی بیر ائرمنی شهری کیمی تقدیم ائدیلمه سی گوستریر کی داشناکلارین ایگرنج اللری هارایا قدر اوزانا بیلیبدیر!
چوخ شاشیردیجی دیر کی ایرانین رسمی اورقانلاریندا ائرمنیدن مودافیعه بیر نورم کیمی گورونور. مثلا قارا کیلسه موسافیرلری نین راحات اولمالاری اوچون 60 کیلومئتیرلیک آسفالت یولو، قارا ضیاء الدین اوچ یولوندان کیلسه نین قاپیسنیا قدر چکیلیبدیر. آنجاق هله میانا- تبریز کیمین ان گئت گللی یولون گئنیشله نمه سینه ویا خود اورمو گولونون ان اونملی کورپو یولونون سونا چاتماسینا هئچ بیر اومود یوخدور!
- 35.000.000 تورک و 35.000 ائرمنی!
آخی نئجه اولا بیلر کی بیر موسلمان آدینی داشییان حاکیمیت، 35 میلیونلوق گونئی آذربایجان موسلمانلارینی یالنیز تورک اولدوغلارینا گوره بو قدر دارلیقلاردا، قورخوتمالاردا ویاساغلیقلاردا ساخلاییر، آنجاق 35 مین نفرلیک ایراندا یاشایان ائرمنی خالقینی عیسوی اولدوغلارینا باخمایاراق و هابئله آرالاریندا چوخلو داشناک تشکیلاتلارین چالیشمالارینا گوز یوماراق، باشی اوسته دولاندیریلیر و حالوا حالوا ائدیر؟!
ائرمنی لرین یئرسیز و یالان نوماییشلرینه موجوویز وئریلیر، اونلارین دیلی بوتون تعلیمات ساحه لرینده تدریس اولونور و حتی قوندارما ائرمنی اولمپیکی آدیندا، ان اوزه ل ایدمان ایمکاناتی اونلارا تقدیم اولونور. حال اینکی آذربایجانلی لارین سهمی آپارتاید رژیمی طرفیندن، یالنیز آلچاقلانماق، هده له نمک، غورشونا دوزولمک و حبسده ساخلانیلماق دیر.
دونیا گوردو کی کئچن خورداد آییندا، یوزلر آذربایجان ایگیدی ایران آدلی درگی نین قوخونج ایهانتینه قارشی گوستردیگی میللی قیاملاردا شهید و یارالی اولدولار و مینلر تورک دوستاقلارا یوللانیلدیلار.50 شهرده آذربایجانلی لارین سیرا قیاملاری باش وئردی. آنجاق آپارتاید حاکیمیتی هله سس سیزدیر.قوی بئله اولسون. باشینی قار ایچینه سوخان کهلیک، قویروغوندان خبرسیز قالار!
- قاراباغین بوراخیلیشی بویوک میللی گوره ویمیزدیر
بئله لیکله تهران حاکیمیتی موطلق ایسلامچی بیر قورولوش ده ییل. او بیرموسلمان و هابئله میللی دوولت اولسایدی تئهران – ییریوان ایلگیلری بوقدر گوجلو اولمازدی. ایسلام اراضی سی نین ایشغالچی سی و موسلمان نوفوسونون قاتیلی کیمی تانینان بوگونکو ائرمنیستان حاکیمییتی، ندنسه ایرانین ان یاخین یولداشی کیمی تمثیل اولونور و اونون فاشیست دوولتینه هرطور یاردیم گونده ریلیر؟! ائرمنی لرین اوز دئدیکلرینه گوره، ایرانین فارس حاکیمیتی، ائرمنیستانین ایشغالچی حاکیمیتی نی یاردیم ائتمکده، «شاه دامار» سانیلیر.
ایندی ایران دوولتی اوز علاقه لرین قودورغان ائرمنی داشناکلاری ایله کسمیرسه، قاراباغین قورتولوشو، آذربایجان ایگیدلرینین گوره ویدیر. بو گوره و چوخ بویوک بیر میللی وظیفه دیر. ائرمنی بوتون آذربایجانی قاپساماق ایسته ییر. اونلارین قاباغیندا دورمالییق.
لوطفا داشناکلارین بو خولیالی خریطه سینه یه دیققت ائدینیز:
بو قوندارما خریطه ده شومالی و جنوبی آذربایجانین ان بویوک پارچالاری، داشناکلارین خولیاسی ایچره یئرلشیر!
آذربایجان باریش قایناغی و تورک عدالت بایراغی دیر
تورکون فارس، کورد و ائرمنی خالقلاری ایله هئچ بیر دوشمانلیقی یوخدور.7.000 ایللیک تاریخه و ان پارلاق کولتوره مالیک اولان آذربایجان تورکلری بوتون دونیا میللتلری و خوصوصیله قونشو میللتلر اوچون باریش، و سئوینج قایناغی دیرلار.ایراندا کئچن 1.200 ایللیک تورک سلطنتلرینده، بوتون خالقلار حاکیملر نظرینده برابر اولموش و تورکون عدالت بایراغی آلتیندا یاشامیشدیرلار. آنجاق تورکون فارس شوونیستلری، کورد فاشیستلری و ائرمنی داشناکلاری ایله نه قدر وارسالار، ساواشی واردیر. کوپکلر و چاققاللار و کافتارلار بونو بیلسین:
35 میلیونلوق نوفوسا مالیک اولان ، 300 میلیون کیلومتیردن داها آرتیق ساحه ده یاشایان آذربایجان تورکونون یوردو، اودلو قوردلار یوردودور.
بوراسی تورک یوردودور، یا سئو یا ترک ائت.
| 
