|
بیز باشاردیق (1)
نوت : کئچن ایل شهریورین اونوندا "یوزگونلوک، اوزگونلوک"، باشلیغیلی یازدیغیم بیر جیزما-قارالاردا سون یوزگونده یاشادیغیم آجیلی-شیرینلی خاطیرهلر و تاثّراتیمی قلمه آلمیش و بیر نئچه یاخین دوستوما گؤندرمیشدیم.
ایندی خورداد قیاملارینین ایل دؤنومو عرفهسینده اونا بیر داها ال گزدیریب، آزادلیق و دموکراسی یولوندا باشلادیغیمیز میلی حرکت تاریخینین بیر نئچه صفحهسی کیمی بوتون دوستلارا ایتحاف ائدیرم."
علیرضا صرافی
1- جی بؤلوم
اؤیله بیر شدت تصمیم ایله چیخدیم کی یولا
گیریش
اردیبهشتین سون هفتهسیندن اعتیبارا تبریز و آذربایجانین باشقا اونیورسیتهلرینده اؤیرنجیلریمیز مدنی بیر اعتیراض حرکتی باشلامیشدیلار ، تورکلرین تحقیرینه قارشی اولان بو اعتیراضلارا حتی بعضی اوستادلار هم ده اونیورسیتهده ایشلهین ایشچیلر ده قوشولوردو. یوزمینی آشان اؤیرنجینین ایشتیراکیله باشلایان حرکتیمیز نهایت اؤز قابیغیندا دایانا بیلمهییب، شهرلریمیزه چکیلمگه یول آچیردی.
تبریزدن اؤنجه خوی شهرینده اؤیرنجیلر اونیورسیتهدن چیخیب، شهر ایچینه گلدیلر. زنجان اونیورسیتهسی اؤیرنجیلری ده تبریز- زنجان جادهسینه چیخیب، یول قیراغیندا دا اؤز اعتیراضلارینی بیلدیرمیشلر.
اما بو حرکتلر اولدوقجا سینیرلی اولوب، خالق کوتلهسینی جیدی حالدا اؤز ایچینه آلا بیلمیردی. دئمهلی خالق باشقا بیر قانونا اویغونلوقلار ایله حرکته گله بیلردی.
تبریز بو ایشی باشارا بیلدی.
میتینگ آخشامی
(یکشنبه 31 – اوردیبهشت 1385)
میتینگ آخشامی علی بدلی و چنگیز بختآور تلفونلا منی آراییب، ایش یئریمه گلدیلر. سؤز، ساباهین میتینگینه گؤره ایدی.
اؤنجهدن اؤیرنجیلر طرفیندن بیر اعلامیه یاییلیب، دوشنبه گونو ساعات دؤرتده دیکباشی (راستاکوچه آغزی)– ندا بیر اعتیراض آکسیاسی کئچیرهجکلرینی بیلدیرمیشدیلر.
بو ایکینفر ده میتینگ آخشامی منیمله مشورتلشیب، قوی-گؤتور ائتمک اوچون گلدیلر، اورادا سؤزوموزون اساس مؤوضوعو میتینگین تمامیله مدنی پرنسیپلره دایالی، دینج شراییطده و قانون چرچیوهسینده کئچیریلمهسی ایدی. بئله قرارا گلینمیشدی کی هامی راستاکوچه آغزینا توپلانیب، اؤنجهدن تعیین اولموش شوعارلاری وئرندن سونرا مشروطیت ائوینه ساری یوروسونلر، نهایت مشروطیت ائوی قارشیسندا آزادلیق و عدالت نامینه نئچهمیز دانیشیب، شعر اوخومالی و نهایت، سون سؤز بیر بیانیه ایله رسما اعلان ائدیلیب، ان اوزاق باشی ساعات آلتیدا میتینگه سون قویولسون.
ایشی برکیتمک اوچون قرارا آلیندی کی علی بدلی اؤیرنجیلرین آدیندان اوستاندارییه باش ووروب، برنامهنی رسما اونلارا بیلدیرسین. قانوناً بیلگی وئرمک لازیم ایدی، بونون اوچون ده بیر مکتوب آذربایجان والیسی معمارزادهیه یازیلدی. مکتوبون قیساجا مضمونو بئله ایدی:
"استاندار محترم آذربایجان شرقی جناب آقای معمارزاده
چنانچه استحضار دارند، روزنامهی ایران در تاریخ 23 اردیبهشت طی نوشته و کاریکاتوری، آشکارا به ترکها اهانت نمودهاست. در پاسخ به این تحقیر ملی طی هفتهی گذشته دانشگاههای آذربایجان و همچنین سایر دانشگاههایی که در آن گروه نسبتا قابل توجهی از ترکها حضور دارند، تظاهراتی با شرکت مجموعا یکصدهزار دانشجو به راه افتادهاست. حال نیز اهالی تبریز با مراجعه به ما دانشجویان، درخواست کردهاند، به منظور شرکت مردم شهر در این اعتراضات، میتینگی با همان مضمون و شعارها را در داخل شهر برپا کنیم.
از اینرو روز دوشنبه اول خردادماه 1385 راس ساعت چهار در ابتدای راستهکوچه گردهم آمده، با شعارهای زیر، به سمت خانهی مشروطیت حرکت خواهیم نمود و نهایتا با قرائت یک قطعنامه، تظاهرات را به پایان خواهیم رساند.
از جنابعالی نیز به عنوان استاندار محترم آذربایجان انتظار داریم که شخصا به این اعتراضات نمادین مردم ما بپیوندند. ما شما را به شرکت در این میتینگ و بیان اعتراض خود دعوت نموده، در عین حال تقاضا مینمائیم به نیروهای انتظامی و امنیتی دستورات و سفارشات لازم را جهت تامین آرامش و امنیت تظاهرکنندگان صادر فرمایند.
دانشجویان دانشگاههای تبریز"
بو مکتوبو، ایالتین یوخاری مقاملارینا چاتدیرماقدان مقصد، دؤولت مسئوللارینی رسما میتینگدن خبردار ائدیب، اونلارا داشیدیقلاری مسئولیتی وورغولاماق، عین حالدا جماعته ده لازیمی مشروعیتایچیندهلیک و پسیکولوژیک حاضیرلیق یاراتماق ایدی. بو ایسه میتینگه قاتیلماغین ریسکینی آزالدیب، بیر چوخ قورخوب، چکیننلری بئله مئیدانا گتیرردی.
همان گون بیانیهنین ده متنی تنظیم اولدو. اونون دا قیساجا مضمونو بوندان عیبارت ایدی:
" بیز تبریزین موباریز جماعتی بوگون آزادلیق و عدالت نامینه مشروطه قیامینین یوزایللیگینده، مشروطیت ائوی قارشیسیندا توپلانیب، اؤز اعتیراضیمیزی ایراندا دانیشماقدا اولان بیر پارا شوونیستی سیاستلره قارشی بیلدیررک، دؤولتدن رسما آذربایجان تورک میلتیندن عوذر ایستهییب، ائلهجه ده میلتیمیزه توهین ائدنلرین جزالاندیریلماسینی و دیل حاقلاریمیزین رعایت اولوب، قورونماسینی طلب ائدیریک.
بیانیه و مکتوبون سونوندا دا میتینگده سسلنهجک بو شوعارلار قئیده آلیندی :
یاشاسین آزادلیق
یاشاسین عدالت
منیم دیلیم اؤلن دئییل، اؤزگه دیله دؤنن دئییل
تورک دیل رسمی اولسون!
آنا دیلده مدرسه، مدرسه
هارای، هارای، من تورکم
اولسا قیزیلدان قفسیم، آزادلیغا وار هوسیم
آذربایجان میلتی، چکنمز بو ذیلتی
آذربایجان اویاقدی، وارلیغینا دایاقدی
آذربایجان اویاقدی، اؤز دیلینه دایاقدی
و. . . . . بو کیمی"
اونون یانی سیرا عینی مضمونلاری داشییان فارسجا دا شوعارلار یازیلدی.
سونرا علی بدلی بیزدن آیریلیب، صاباح سحر چاغی دا اوستاندارییه گئتمگی بوینونا آلدی.
***
اؤیله بیر شدت تصمیم ایله چیخدیم کی یولا
چنگیز آیریلمادان اول، منه نیروگاهداکی ایشچی حرکتیندن دانیشیب و بیر رسمی مکتوبون دا فوتوسونو وئردی کی اورادا چنگیز نیروگاه ایشچیلرینین نومایندهسی کیمی مکتوبو ایمضالامیشدیر. او دئدی:
آدامدی، ایشدی! ساباه توتولسام گؤنول ایستر کی منیم ایشچی نومایندهسی اولدوغوم دا، دئییلسین خبرلرده.
دئدیم:
- نیه کی توتولاسان؟ بو میتینگین تایی اونلارجا میتینگ اونیورسیتهلرده باش توتوب، بیز ده کی رسمیت و مشروعیت ایچینده، رسمی مقاملارا موراجیعت ائدرک بو ایشی گؤروروک، ایشالله توتولوب، ائلهین اولماز. !
بونونلا بئله هر ایکیمیز ده چوخ یاخشی بیلیردیک کی ساباه آغیر بیر گوندور، بیز نه قدر مدنی داورانساق بئله، قارشی طرفلر هئچ ده مدنی پرنسیپلره صادیق قالمایا بیلردیلر.
آیریلارکن الینی یوخاریدان گتیریب، الیمه چیرپیب، برک سیخدی. ائله کی ایستر – ایستمز اونو عبدالحق حامدین بو شعرینی اوخومامیش، یولا سالا بیلمهدیم:
اؤیله بیر شدت- تصمیم ایله چیخدیم کی یولا
قارشیما چیخسا اگر سنگ مزاریم، دؤنمم.
بحر زخّار دگیل، ابر شرربار دگیل
هئپ یانار داغلار ایله دولسا جیواریم، دؤنمم.
***
او گئجهنی سحره کیمی یاتا بیلمهدیم گئجه یاریسی ایکی- اوچ کره آلچاقدان اوچان طیاره سسیله آیاغا قالخیب، پنجرهدن گؤی اوزونه باخدیم آما گؤزوم نه ایسه سئچمهدی. سونرالار ائشیتدیم ایکی طیاره، ترکیبینده تورک اولمادیغی "یگان ویژه"نی گئجه گؤزو تبریزه گتیرمیشدیلر.
سحره کیمی در- دیوارا باخیب، دولانیردیم... سانکی دیوارا آسدیغیم شکیللر منیمله دانیشیردیلار. ستارخانین، باغیرخانین قایغیلی گؤزلری ساباهی گؤزلهییردی.. کیم بیلر بلکه ده بو گئجه چوخلاری، منیم کیمی آییق قالمیشدیلار....
یادیما دوشدو: ایکی ایل اؤنجه (83-جو ایلین قیشیندا) بابک قالاسی مراسیمینه حاضیرلیق دانیشیقلاری زامانی بیر نئچه جلسهمیز اولدو تبریزده، اورادا بئله بیر صؤحبت ایرلی گئتدی کی بابک قالاسی مراسیمی عوضینه همان گون تبریزده مراسیم کئچیریلسین. سون قرار بو اولدو کی بابک قالاسی مراسیمینین واقتی و یئری دگیشیلمهسین آنجاق باشقا واقتلاردا، باشقا موناسیبتلره گؤره، تبریز قالاسینا جیدی اؤنم وئریلسین.
قارشیسنا سد چکیلن بابک ایرماغینین بیر قولو، مشروطیت ایل دؤنومونده تبریزه آخیب گلدی. او گون گنجلریمیز باغیرخان مزاریندان کؤهنه خیاوانا قدر میلی شوعارلار وئررک یورودولر.
سونرا خیابانی و 21 آذر حرکتلرینه گؤره ییغینجاقلار اولدو، بهمن آییندا فرزانه مراسیمی گوجلو بیر نوماییشه چئوریلدی.
نئچه گون سونرا 21 فوریه دونا آنادیلی گونو ایدی، تبریزده یئدی اوجاق قورولدو، آنادیلینی سئونلریمیز بو اوجاقلارا توپلانیب، مراسیملر کئچیردیلر.
بو آرادا اؤنملی بیر حادیثه ده اوز وئردی، اونلارجا خیردا یاشلی (5-12) یاشیندا قیز و اوغلان اوشاقلاری، آنالاریله بیرلیکده آنادیلی مراسیمی اوچون نوماییش کئچیردیلر. باغیرخان مزاریندان باغیرخان کؤرپوسونه قدر آیاقدا یورویرک، "هارای، هاری من تورکم" باغیردیلار و ان سونوندا بیر قطعنامه اوخویوب، میتینگه سون قویدولار.
"هارای، هارای من تورکم" شوعارینی ایلک دفعه همین خیردا یاشلی اوشاقلاردان ائشیتدیک.
سونرا ایسفندین یئددیسینده داشناکلارین علیهینه بیر شریعتی (شهناز) خیاوانیندا داها گوجلو بیر مراسیم اولدو.
سونرا سهند افشاری مراسیمی بیزیم اوچون بیر گوج گؤسترگهسینه چئوریلدی.
سونرا اردیبهشت آییندا تراکتورسازی تیمینین تشویقی اوچون هامی باغشمالا توپلانیب، اورادان ساعات قاباغینا قدر میلی شوعارلار وئررک، یورودولر.
بو آردیجیل یورویوشلر هامیمیزدا روحیه یوکسلیشی و اؤزونه گوونلیک حیسینی گوجلندیردی....و ایندی اوردا-بوردا تجروبه قازانیب، اؤز گوجونو، هم ده قارشی طرفین گوجونو سینایان بیز، بوتون بو یورویوشلرین ذیروهسینه قالخاجاق ساباهین میتینگینی گؤزلهییردیک.
کیم بیلیردی تبریز قالاسینین دیک باشیندان باشلانان میتینگیمیز، دؤنرگه دؤندرن بیر قیاما چئوریلهجک:
"قوسی" گرکدی سجده قیلیب، ایقتیدا قیلا
تبـــریز قلعهسینه سیپاهان دئدیکلری |
دوشنبه,۳۱ اردیبهشت ۱۳۸۶ 
